هەرکات یەکێک لەم حاڵەتانەی خوارەوەت لە منداڵەکەتدا بەدی کرد، پێویسته سەردانی پزیشکی چاوی پێ بکەیت بۆ زانینی بوون و نەبوونی گرفت لە چاوەکانیدا، دکتۆر ئاری پزیشكی پسپۆری چاو 10 نیشانه‌ بۆ دایكان و باوكان ده‌خاته‌ ڕوو كه‌ پێویسته‌ زانیارییان له‌باره‌یه‌وه‌ هه‌بێت.

1- چاو تروکاندنی زۆر: لەوانەیە نیشانە بێت بۆ بوونی نەخۆشی چاو، بە تایبەتی هەستیاری و وشکبوونەوەی چاو. 

2- جوڵەی نائاسایی و لەرزینی چاوەکانی: لەوانەیە نیشانەی لاوازی تۆڕەی چاو و نەخۆشی زگماکی چاوەکانی بێت وەک لەرەلەری چاو (نستاگمز). 

3- ئاوکردن و ڕیپۆقی چاو: لەوانەیە نیشانەی نەخۆشی هەوکردنی میکرۆبیی چاو یان گیرانی بۆری فرمێسکی بێت. 

4-چاو هەڵنەهاتن بە ڕووناکی: ئەگەری هەیە نیشانەی برینداری و تەنی نامۆی سەر گلێنەی یا هەوکردنی گلێنەی چاو یان فرە هەستیاری چاوەکانی بێت. 

5- زۆر لە نزیکەوە ته‌ماشاكردنی تیڤی: ئەگەری ئەوەی لێ ئەکرێت چاوی مناڵەکە کز بێت بۆیە لە نزیکەوە سەیری دەکات، نەک ئەوەی لە نزیکەوە سەیرکردن بووبێتە هۆی کزبوونی چاوی. 

6- هەر پەڵەیەکی سپی لەناوەڕاستی ڕەشێنەی چاوی مناڵدا ئەگەری نەخۆشی مەترسیداری لێ دەکرێت. 

7- تیلی و سوڕانی چاو بۆ ناوەوە یان دەرەوە واتە کێشەیەکی گرنگ لە چاویدا هەیە و پێویستی بە چارەسەری خێرا هەیە، وەک خێلی وتەمبەڵی . 

8- پێ هەڵکەوتن و خۆکێشانی بە شتەکانی ناوماڵدا، بە تایبەت لە شەواندا ئەگەری چاوکزی یان شەوکوێری لێ دەکرێت، پێویستی بە پشکنینە. 

9- تەمەڵی لە قوتابخانە و نەبوونی تاقەتی سەعیکردن ئەگەری هەیە نیشانەیەکی چاوکزی بێت. 

10- بوونی سەرئێشە بەبێ بوونی هۆکاری دیاریکراوی تر، ئەگەری هەیە بگەڕێتەوە بۆ هەندێک جۆری کزی یان نەخۆشی چاو.