لەم چاوپێكەوتنەی (هەواڵ)ـدا، ئاسۆ عادل، یاریزانی بالەی یانەی وەرزشی پێشمەرگەی سلێمانی، باس لە ژیانی وەرزشی خۆی دەكات و هاوكات پێی وایە  ئاستی یاری بالە لە كوردستان زۆر باشەو داوای زیاتر برەودان بەو یارییە دەكات بۆ ئەوەی نەوەیەكی نوێ و خاوەن توانا لە ئایندەدا بێنە مەیدانەكەوە.

-  ناوم ئاسۆ عادل قادر-ە، لەدایكبووی ساڵی (1983)ـی دەربەندیخانم، دەرچووی كۆلێژی پەروەردەی وەرزشی سلێمانیم، ئێستاش مامۆستام لە ئامادەیی دەربەندیخان و یاریزانی بالەی یانەی پێشمەرگەی سلێمانیم.

- سەرەتای دەستپێكردنم بە یاری بالە دەگەڕێتەوە بۆ ژێر چاودێری كاك ئەركان ئەو كات یانەی گەرمیان هەبوو، دوای چەند ساڵێك پەیوەندیم بە یانەی وەرزشی دەربەندیخانەوە كرد، دواتر رووم لە یانەی پێشمەرگەی سلێمانی كرد و تائێستاش بەردەوامم. 

- بەشداری زۆر خول و پاڵەوانێتیم كردووە لەسەر ئاستی كوردستان و عێراق و پاڵەوانێتی عەرەب كە لە وڵاتی لوبنان و تونس بەڕێوەچوو، لەگەڵ ئەوەشدا ، دووجار پلەی دووەمی عێراقمان بەدەستهێناوەو سێ جاریش پلەی چوارەم.

- بە بڕوای من یاری بالە لە كوردستان زۆر باشە، بەڵام ئەوەش پێویستی بە برەودان و پاڵپشتی زیاتر هەیە، چونكە ئەگەر هاوكاری و پاڵپشتی زیاتر نەكرێت ئەوە بێگومان بەرەو دواوە هەنگاو دەنێت، سەبارەت بە عێراقیش بێگومان خولی عێراقی یاریزانی پیشەگەری تێدایەو هەموو چاوكراوەن و خاوەن توانایەكی زۆر باشن. 

- بەدڵنیاییەوە هاندەران دەتناسن و رێزت لێدەگرن، منیش رێزو خۆشەویستی تایبەتیم هەیە بۆیان، چونكە ئەگەر ئەوانیش نەبن و تەماشای یارییەكان نەكەن، یاری هیچ چێژێكی تێدا نیە.

- من سەرسامی هەمو كارێكی جوانم، هەریاریزانێك  یان تیپێك كاری جوان بكات، پێی سەرسام بوومە.

- پێویستە چەندین خوێندنگەی وەرزشی بكرێنەوە بۆ پێگەیاندنی یاریزانی لێهاتوو، بۆ ئەوەی گەنج و لاوی زیاتر بێنە نێو بوارەكەو یاری بالە هەمیشە لە نوێگەریدا بێت.

- تائێستا بیرم لە هیچ یانەیەكی تر نەكردۆتەوە، چونكە لە یانەی پێشمەرگە شان بە شانی هاوڕێكانم زۆر ئاسوودەم.

- رێزو خۆشەویستیم بۆ رۆژنامەی (هەواڵ) و هەموو ئەو بەڕێزانەی هاوكارم بوونە لە ژیانی وەرزشی و ئاساییمدا.