كەچەڵی و سپی بوونی تاڵەكانی قژ لە پیاواندا پێش تەمەنی 40 ساڵی مەترسیدارە
ته‌ندروستی -
ئەنجامەكانی توێژینەوەیەكی نوێ كە لە لایەن چەند پزیشكێكی ئەوروپی ئەنجامدراوە تیایدا هاتوە ئەو پیاوانەی كەچەڵ دەبن پێش تەمەنی 40 ساڵی و تاڵی سپی لەسەریاندا دەردەكەوێت ئەوە ئەگەری توشبونیان بە نەخۆشی دڵ زۆر دەبێت.
ئەو پزیشكانەی ئەم توێژینەوەیەیان ئەنجامداوە لە میانەی كۆنفرانسێكی زانستیدا كە لەم دواییانە لە هندستان بەڕێوە چوو ئەوەیان ئاشكرا كرد " لە ماوەی توێژینەوەكانی پێشووتر تێبینی ئەوەیان كردوە پەیوەندیەكی ڕاستەوخۆ هەیە لەنێوان كەچەڵ بوون و سپی بوونی تاڵەكانی قژ و توشبوون بە نەخۆشیەكانی دڵ و جارێكی دیكەش پشكنین بۆ چەند كەسێكی خۆبەخش كراوە و توێژینەوەیان لەسەر كراوە".
ئەنجامی توێژینەوە نوێكە ئەوەی ئاشكرا كردوە %27 ی ئەو كەسانەی نەخۆشی دڵیان هەیە ئەوانەی كە كەچەڵ بوون و تاڵی سپی لەسەریاندا دەركەوتوە پێش تەمەنی 40 ساڵی .
شارما یەكێكە لە سەرپەرشتیارەكانی ئەم توێژینەوەیە لەسەر ئەم بابەتە دەڵێت" هەبوونی پەیوەندی ڕاستەوخۆ لە نێوان سپی بوونی تاڵەكانی قژ و كەچەڵ بوون و نەخۆشی دڵ بۆ ئەوە دەگەڕێتەوە جەستەی مرۆڤەكە پێش وەخت پیر بووە و بەهۆیەوە ئەم دوو حاڵەتە دەردەكەوێت، لەبەر ئەوە ڕێنمووی ئەو كەسانە دەكات كە پێش وەخت تاڵی سپی لەسەریاندا دەردەكەوێت یان كەچەڵ بوون ئەوە زۆر ئاگاداری تەندروستی دڵیان بن"