داخورانی جومگە دەبێتە هۆی زیان گەیاندن بەو شانە پارێزەرەی کە کۆتایی ئێسکەکانی ناو جومگەکان دادەپۆشێت، بە تێپەڕبوونی کات وردە وردە ئێسکەکان تێکدەچن و دەبێتە هۆی ئازار و ڕەقبوون و کەمبوونەوەی جوڵەی جومگەکان، دکتۆر عمر پسپۆری نەخۆشیەکانی جومگە و بڕبڕەی پشت و ڕۆماتیزم له‌م بابه‌ته‌دا ورده‌كاری زیاتر باسده‌كات.

دکتۆر عمر ده‌ڵێت"داخورانی جومگە دەتوانێت کاریگەری لەسەر هەر جومگەیەکی جەستە هەبێت بەڵام زۆرترین جار تووشی ئەژنۆ و دەست و بڕبڕەی پشت دەبێت."

هۆکارەکانی:

هۆکاری وردی داخورانی ئێسک و جومگەکان بە تەواوی دیار نییە، بەڵام دەکرێت لە ئەنجامی کۆمەڵێک لە هۆکارە بۆماوەییەکان و ژینگەییەکانەوە بێت.

هۆکارەکانی مەترسی بۆ داخورانی ئێسک بریتین لە :

1-هەڵکشانی تەمەن، و تەمەنی سەروو ٥٠ ساڵ

2-قەڵەوی

3-برینداربوون یان زەبر و زەنگی جومگەکان

4-فشاری دووبارە لەسەر جومگەکان

5-لاوازی ماسولکەکان

6-مێژووی خێزانی تووشبوون بە داخورانی جومگە.

باوترین نیشانەکانی داخورانی ئێسک و جومگەکان بریتین لە:

1- ئازاری جومگەکان بەتایبەت لەگەڵ جوڵە یان چالاکییەکانی هەڵگرتنی کێش.

2- ڕەقبوون بەتایبەتی بەیانیان یان دوای ماوەکانی ناچالاکی.

3- ئاوسانی دەوروبەری جومگەکانی تووشبوو.

4- کەمبوونەوەی جوڵە یان نەتوانینی جوڵاندنی جومگەکە.

5- هەستکردن بە خڕەخڕ (crepitus) کاتێک جومگەکە دەجوڵێت.