ددان هاوشێوه‌ی‌ ئه‌ندامه‌كانی دیكه‌ی‌ جه‌سته‌ ئه‌و كاته‌ی‌ گرفت و كێشه‌یه‌كی ته‌ندروستی ده‌بێت نیشانه‌ی‌ جیاوازی له‌سه‌ر ده‌رده‌كه‌وێت، له‌وباره‌یه‌وه‌ ‎دكتۆرە ڕۆشنا پزیشكی نەشتەرگەری دەم و ددان ڕوونكردنه‌وه‌ی‌ زیاتر ده‌دات له‌باره‌ی‌ ئه‌و نیشانانه‌ی‌ مرۆڤ ئاگادار ده‌كه‌نه‌وه‌ كه‌ پێویسته‌ سه‌ردانی پزیشكی ددان بكات.

1- ئازار و ھەڵئاوسان:

ئازار و ھەڵئاوسان لە ناوەوەی دەم، زۆرجار لە ڕووخسار و مل ئاماژەن بۆ پێویستی سەردانیكردنی پزیشكی ددان.

2-ھەڵئاوسانی پووك:

كاتێك پووكت ھەڵدەئاوسێت و دواتر لەكاتی شۆردنی ددان یاخوود بەكارھێنانی داوی ددان خوێنی لێدێت، پێویستە سەردانی پزیشكی ددان بكەیت.

3-ئەگەر نەخۆشییەكی درێژخایەنت ھەیە:

پزیشكی ددان بكە بە بەشێك لە دەستەی چارەسەرەییەكانت ئەگەر ھەندێك نەخۆشی وەكو ( شەكرە، نەخۆشییەكانی دڵ و كێشەی خواردن و ھەرسكردن)ت ھەیە، ھەروەھا لە كاتی وەرگرتنی  چارەسەری كیمیایی، تیشك و ھۆڕمۆنی پێویستت بە سەردانیكردنی پزیشكی ددان دەبێت.

4-دووگیانی:

سەردانیكردنی پزیشكی ددان لە ماوەی دووگیانییدا نەك تەنھا تەندرووستە، بەڵكو پێویستیشە، چونكە لە كاتی دووگیانیدا لە ئەنجامی گۆڕانكاری لە ڕێژەی ھۆڕمۆنەكاندا دەكرێت ھەندێك كێشە بۆ دەم و ددانی دایكەكە درووست ببێت كە دوور نییە دواتر كار بكەنە سەر تەندرووستی كۆرپەلەكەش.

5-بەكارھێنانی ھەر جۆرێكی تووتن:

جگەرە كێشان و بەكارهێنانی ھەر جۆرێكی تری تووتن دەكرێت ھۆكار بن بۆ زۆربەی كێشەكانی دەم و ددان وەكو كلۆری ددان، نەخۆشیەكانی پوك،  بۆنی ناخۆشی دەم و كلسی ددان.

6-برینی ناودەم:

ئەگەر ھەست دەكەی لە ناودەمتدا شتێكی نائاسایی یاخوود برینێك ھەیە باشترە پزیشكەكەت ئاگاداربكەیەوە و پشكنینت بۆ بكات، چونكە زۆربەی برینەكانی ناودەم ئاماژەن بۆ بوونی نەخۆشییەك.

7-تەنانەت ئەگەر ھیچ نیشانەیەكیشت نەبوو:

بۆ سەردانیكردنی پزیشكی ددان پێویست نییە ھەمیشە ھەست بە ئازارێك بكەین، بەڵكو پێویستە بۆ پشكنینی تەندرووستی دەم و ددانمان سەردانی پزیشكەكەمان بكەین، لەبەرئەوەی زۆرجار نەخۆشی و بارودۆخە نەخوازراوەكان لە سەرەتادا بێ نیشانەن و كاتێك نیشانەكانیان دەردەكەون كات بۆ چارەسەكردنیان درەنگ بووە.