ڕاپۆرت - وێنه‌ : تیپی ئالان بووە یەكەمی پاڵەوانەتییەكە




پێشمەرگە سپۆرت - 

ئامادەكردنی: گوڵزار فەرەج

بەبردنەوەی لەتیپی كچانی (DSA)، تیپی كچانی خوالێخۆشبوو ئالان، بووە پاڵەوانی پاڵەوانییەتی ئالان عەلی بۆ تۆپی سەبەتەی كچان.

لە هۆڵی داخراوی یانەی وەرزشی سلێمانی، یاری كۆتایی پاڵەوانییەتی ئالان عەلی بۆ تۆپی سەبەتەی كچان لەنێوان تیپەكانی (ئالان)‌و ئەكادیمیای خەونی وەرزشی (DSA) بەڕێوەچوو، دوای یارییەكی بەهێز‌و پڕ چێژ، تیپی ئالان توانی بەئەنجامی (49-32) سكوێر یارییەكە بباتەوە‌و ببێتە پاڵەوانی پاڵەوانەتییەكە.

دوای یارییەكەش لەلایەن ژمارەیەك لەئەندامانی یەكێتی ژنانی كوردستان‌و خانەوادەی ئالانی كۆچكردو‌و هاوڕێ‌‌و هاوكارەكانی، خەڵاتەكانیان پێشكەشی تیپە سەركەوتووەكان كرد.

خاتوو سەیوان رۆستەم ئەندامی سكرتارییەتی یەكێتی ژنانی كوردستان بەپێشمەرگە سپۆرتی راگەیاند: ئامانج لەم پاڵەوانێتییە دەرخستنی تواناكانی ژنانە لەهەموو بوارەكانی ژیاندا بەتایبەتی وەرزش، بۆیە پێمانباش بوو هانیانبدەین‌و بزانن كە یەكێتی ژنانی كوردستان ئامانجێتی برەو بەوەرزش بدات.

وتیشی: "بۆ رێزلێنان لەگیانی پاكی ئالان عەلی ڕۆژنامەنوسی رۆژنامەی ژیانەوە‌و سەرپەرشتیاری سەرجەم چالاكییە وەرزشییەكانی یەكێتی ژنانی كوردستان، لەیادی 32 ساڵەی دامەزراندنی یەكێتی ژناندا ئەم پاڵەوانێتییەمان پێشكەشی رۆحی پاكی كرد".

خاتوو سەیوان رۆستەم سوپاس‌و پێزانینی رێكخراوەكەیانی ئاراستەی هەموو تیپە بەشداربووەكان‌و هەردوو یانەی سلێمانی‌و یانەی رۆژ‌و هەموو ئەو دڵسۆزانە كرد كە هاوكار بوون لەسەركەوتنی ئەم پاڵەوانێتییەدا.

لەبارەی رێكخستنی ئەم جۆرە پاڵەوانێتیانە، ئالان حسێن ئەحمەد جێگری بەرێوەبەری بەڕێوەبەرایەتی وەرزشی سلێمانی وتی: "ئێمە پێمان باشە ئەم خولانە بەردەوام بێت بۆ ئەوەی كچان و ژنان ئەم یاری و خولانە ببینن، بۆ ئەوەی وەرزش پێشكەوتنێكی بەرچاو بەخۆیەوە ببینێت".

وتیشی: "هیوادارم نەك هەر تۆپی سەبەتە، بەڵكو پاڵەوانێتی بالە‌و تۆپی پێ‌‌و سەرجەم یارییەكانی تر سازبكرێت‌و بتوانرێت دوو مانگ یان سێ‌ مانگ جارێك  بكرێتەوە، چونكە سودێكی زۆری ئەبێت بۆ هەمو لایەنەكانی وەرزش".

یەكێتی ژنانی كوردستان لەیادی 32 ساڵەی دامەزراندنیدا پاڵەوانییەتی ئالان عەلی بۆ تۆپی سەبەتەی كچانی كردەوە كە تیپەكانی (ژیما‌و ئالان‌و ئەكادیمیای خەونی وەرزشی‌و فێرگەی تۆپی سەبەتەی سلێمانی-كچان) بەشدارییان تیا كردبوو.

خوالێخۆشبوو ئالان عەلی رۆژنامەنووس‌و لێپرسراوی لاپەڕەی وەرزشی ژیانەوە‌و سەرپەرشتیاری سەرجەم چالاكییە وەرزشییەكانی یەكێتی ژنانی كوردستان، ساڵی 1973 لەدایكبووە‌و ماوەی زیاتر لە 20 ساڵ لەرۆژنامەی ژیانەوە كاری كردووە‌و رۆژی 11/4/2020 بەهۆی نەخۆشییەوە لە شاری‌ سلێمانی كۆچی دوایی كرد.



PM:09:03:12/11/2021




ئه‌م بابه‌ته 1744 جار خوێنراوه‌ته‌وه‌‌