پێشمه‌رگه سپۆرت -
خولێكی رۆژنامەوانی وەرزشی لەسنووری راپەڕین بەسەركەوتوویی رێكخرا :
هاوكات لەگەڵ نزیكبوونەوەی یادی راپەڕینە شكۆدارەكەی بەهاری 1991، لەشارۆچكەی رانیە خولی بەرزكردنەوەی ئاست و پەرەپێدانی توانای میدیاكارانی وەرزشی سنووری ئیدارەی راپەڕین كۆتاییهات.
بەبەشداری 17 رۆژنامەنووس و نووسەری وەرزشی و ئارەزوومەندانی فێربوونی بوارەكە، بۆ ماوەی دوو رۆژ 1 و 2ی ئاداری 2021 خولی بەرزكردنەوەی ئاست و پەرەپێدانی توانای میدیاكارانی وەرزشی سنووری ئیدارەی راپەڕین رێكخرا.
خولەكە بەچاودێری نووسینگەی راپەڕینی نوێنەرایەتی سلێمانی لــیــژنەی ئـۆڵـۆمـپی هەرێمی كوردســتـــان و بەهاوكاری (ماڵپەڕی كوردیش سپۆرت ستارز) و بەئامادەبوونی ژمارەیەك لەبەرپرسانی حكومی و حزبی و وەرزشی لەهۆڵی میرزا مەنگوڕی لەكتێبخانەی گشتی رانیە رێكخرا و تیایدا زاگرۆس نانەكەلی رۆژنامەنووس و نووسەری بەئەزموونی وەرزشی وانەكانی بەبەشداربووان وتەوە و دواجاریش ئەمڕۆ 2ی ئاداری 2021 لەڕێوڕەسمێكدا لەلایەن ئامادەبووانەوە بڕوانامەی خولەكە بەبەشداربووان بەخشرا.
لەمبارەیەوە زاگرۆس نانەكەلی وانەبێژی خولەكە لەلێدوانێكدا ئەوەی پێوتین كە ئەو ئامادەیە خۆبەخشتانە و بەپێی توانا ئەزموونەكانی كاركردنی لەڕێگەی ئەمجۆرە خول و كۆڕ و كۆبوونەوە و سیمینارانەدا بۆ رۆژنامەنووسانی وەرزشی بگوازێتەوە بۆ ئەوەی ئەوانیش بتوانن لەگۆڕانكارییەكانی بواری میدیای وەرزشی بێبەش نەبن.
*سەباح ساڵح سەعید/ لێپرسراوی نووسینگەی راپەڕینی نوێنەرایەتی سلێمانی لیژنەی ئۆڵۆمپی كە ئەركی ئەم خولەی لەئەستۆگرت، وتی: بەشبەحاڵی خۆمان ئەوەی لەتوانای ئێمە دابێت بۆ فێركردن و بەرەوپێشبردنی ئاستی رۆژنامەنووسانی وەرزشی دەڤەرەكەمان پێشكەشی دەكەین بۆ ئەوەی ئەوانیش لەكاروانەكە دانەبڕێن.
*سەنگەر زرار/ سەرنووسەری ماڵپەڕی كوردیش سپۆرت ستارز وتی: بیرۆكەی ئەنجامدانی خولەكەمان لەوەوە سەرچاوەی گرت كە شارۆچكە و شارەدێكانی كوردستان بێبەشن لەمجۆرە خولانە و ئومێد دەكەین بتوانین ئەم ئەزموونی كاركردنە بەهەماهەنگی هەموو ئەوانەی ئامادەن كارمان لەگەڵدا بكەن، بگوازینەوە هەموو دەڤەرەكان.
ئاراس لەتیف نادر/ بەڕێوەبەری خول و سكرتێری رێكخراوی ئاریا بۆ پەرەپێدانی میدیای وەرزشی وتی: لەم بارودۆخە ناسكەدا كە پەتای كۆڕۆنا بەربڵاوە، ئەوە یەكەم كاری ئێمەیە بەهاوبەشی و هاوكاری لەگەڵ نووسینگەی راپەڕینی نوێنەرایەتی سلێمانی لیژنەی ئۆڵۆمپی ئەنجامی بدەین، لێرەوە داواكارم لەلایەنە پەیوەندیدارەكان لەهەموو سنوورەكان بۆ كردنەوەی ئەمجۆرە خولانە هاوكارمان بن.