‌هۆكارێكی‌ گرنگ و سەیر وا لە بەرشەلۆنە دەكات كە دەستبەرداری‌ كۆتینۆ بێت




پێشمه‌رگه‌ سپۆرت -

ئەگەر بەرشەلۆنە بۆ وەرزی‌ داهاتوو پارێزگاری‌ لە تواناكانی‌ كۆتینۆ بكات ، دەبێت 20 ملیۆن یۆرۆ بداتە یانەی‌ لیڤەرپوڵ بەم هۆكارەش یانە كەتەلۆنییەكە دەیەوێت دەستبەرداری‌ تواناكانی‌ كۆتینۆ بێت .

لە ئێستادا كۆتینۆ بە خواستن بۆ یانەی‌ بایرن میونخ یاری‌ دەكات و كۆتایی ئەم وەرزە دەگەرێتەوە یانەی‌ بەرشەلۆنە.

ڕۆژنامەی‌ میترۆی‌ بەڕیتانی‌ باس لەوە دەكات كە لە گرێبەستی‌ نێوان لیڤەرپوڵ و بەرشەلۆنە سەبارەت بە كۆتینۆ خاڵێك هەیە ئەگەر كۆتینۆ 100 یاری‌ بە درێسی‌ بەرشەلۆنەوە ئەنجامدا دەبێت یانە كەتەلۆنییەكە 20 ملیۆن یۆرۆی‌ تر بداتە لیڤەرپوڵ .

ڕۆژنامەكە باس لەوەش دەكات كە كۆتینۆ لە ماوەی‌ وەرز و نیوێك بۆ بەرشەلۆنە 76 یاری‌ ئەنجامداوە و تەنها 24 یاری‌ ماوە بۆ 100 یارییەكە. 

لە كۆتایشدا میرەر ئاماژە بەوەش دەكات كە ئەگەر بەرشەلۆنە خولی‌ یانە پاڵەوانەكانی‌ بەدەستهێنا و كۆتینۆ بەشێك بوو لە پێكهاتەكە دەبێت پێنج ملیۆنی‌ تر بدەنە لیڤەرپوڵ .

هەموو ئەم هۆكارانە وا دەكەن یانەی‌ بەرشەلۆنە لەم هاوینەدا دەستبەرداری‌ بێت.
 


PM:04:25:04/05/2020




ئه‌م بابه‌ته 819 جار خوێنراوه‌ته‌وه‌‌


زۆرترین خوێنراو‌
‌ ‌