بیركۆڵی بریتیەلە پوكانەوەو لەناوچوونی خانەكانی مێشك كە خۆمان پێی دەڵێن (خه‌ڵەفاندن) ، لە ئێستادا ئەم نەخۆشیە لە جیهاندا زیادیكردووە چونكە رێژەی كەسە بەتەمەنەكان ڕووی لە زیادیكردووە و ئەم نەخۆشیەش زیاتر رووبەرووی ئەوان دەبێتەوە.

ئەم نەخۆشیە دەبێتە هۆی لەدەستدانی (زاكیرە) واتە یاده‌وه‌ری ، بە هۆیەوە مرۆڤ شتە تازەكانی بیرنامێنێت واته‌ نەخۆش تەنها شتە كۆنەكانی بیردەمێنێت ، هەروەها ئەگەر پلەی نەخۆشیەكە زیاد بكات دەبێتە هۆی ئەوەی نەخۆش كەسوكاری نەناسێتەوە ، هاوكات ئاراستەی رۆشتنی لەدەستدەدات و هەر بەو هۆیەوە نەخۆش شێوازی نانخواردنی بیردەچێتەوە و هەستی برسێتی نامێنێت و نازانێت كەی برسی دەبێت لەبەرئەوە رووبەرووی لاوازبوون دەبێتەوە ، ئەگەر پلەی نەخۆشیەكە زۆر بەرزبێتەوە دەبێتەهۆی لەدەستدانی كۆنترۆڵی پیسایی كە بە هۆیەوە نەخۆش خۆی پیس دەكات.

هۆكاری سەرەكی بیركۆڵی تەمەنە وەكو چۆن هەموو ئەندامەكانی جەستەی مرۆڤ رووبەرووی پوكانەوە دەبێتەوە لەكاتی بەتەمەندا چووندا ، بە هەمان شێوە خانەكانی مێشكیش تووشی پوكانەوە دەبێت هەروەها هەندێ جار بە هۆی جەڵتەوە مرۆڤ لە تەمەنی گەنجی تووشی ئەو حاڵەتە دەبێـت ئەویش بەهۆی نەخۆشیە درێژخایەنەكان روودەدات ، ئەگەر دووبارە بێتەوە دەبێتە هۆی لەناوچوونی چەند خانەیەكی مێشك كە لێپرسراون لە بیركردنەوەو هەستەوەرەكانی دیكە.

یەكێكی تر لە هۆكارەكانی تووش بوون بەو حاڵەتە  بۆماوەییه‌ هەروەها خواردنی ناتەندروست و قەڵەویش هۆكارە ، چونكە مرۆڤی قەڵ و كەمتر ئەجوڵێت ئەمەش كاریگەری هەیە بۆ دروست بوونی ئەو حاڵەتە هەر بۆیە دەبینین ئەو كەسانەی لە گوندەكان نیشتەجێن و خەریكی كشتوكاڵن هەرچەند نەخوێندەواریشن بەڵام ئەو حاڵەتە لەناویاندا كەمترە چونكە بەردەوام دەجوڵێن و هەوای پاك هەڵدەمژن.