ئه‌و شه‌وه‌ی به‌لای‌ منه‌وه‌ مۆندیال ده‌ستی پێكرد!




زاگرۆس نانه‌كه‌لی

ستوون و ره‌خنه‌و نووسینه‌كانم بڕای بڕای دژی هیچ بۆچوون و كه‌سێك نه‌بووه‌، ماستاو و پیاهه‌ڵدانیش به‌هه‌مان شێوه‌، چونكه‌ ره‌خنه‌ی وه‌رزشی بۆ بنیادنان و نوێ بوونه‌وه‌ و به‌خۆداچوونه‌وه‌یه‌، نه‌ك رق و كینه‌ و دڵ ره‌شی، له‌هه‌مانكاتدا به‌ندی گۆرانیش نییه‌ به‌سه‌ر كه‌سدا بیڵێیت!.

ئه‌و باوه‌ڕه‌ كلاسیكه‌شم نییه‌،پێشووتر هه‌رچی ره‌خنه‌ی هه‌بوو ئه‌و قسه‌ی ده‌كرد، (كورد زیندوو كوژی مردوو په‌رسته‌)!، چونكه‌ ئه‌وه‌ی‌ باسی ده‌كه‌م ئێستا له‌ ژیانه‌ و پاڵه‌وانیشه‌، نایناسم، به‌س خوێنمان یه‌كه‌، دڵ و هه‌ستمان یه‌كه‌، ئه‌و وه‌كو من و تۆ كورده‌، ئه‌و بۆ بوونی خۆی و نه‌ته‌وه‌كه‌ی له‌(12) ساڵی دێیه‌كه‌ی جێدێڵێت و روو له‌پیشه‌گه‌ریی ده‌كات،له‌به‌رده‌م پارك و مزگه‌وت و یانه‌كان له‌بێ شوێنی ده‌خه‌وێ، شه‌قام و ئۆتۆمبیل پاك ده‌كاته‌وه‌، پیتزا ئاماده‌ ده‌كات،مه‌رگه‌سات و ناخۆشترین ژیان ده‌گوزه‌رێنێ، شوێنی خه‌وتن و كاركردن و حه‌وانه‌ی نه‌بووه‌، ئه‌وانه‌ی هه‌موو قبوڵ بوو له‌پێناو ئه‌وه‌ی‌ بڵێ من كوردم و وه‌رزش ده‌كه‌م و به‌ره‌و لووتكه‌ هه‌ڵده‌كشێم،ئه‌و له‌دێیه‌كه‌ی خۆیان شوانكاره‌ بوو،یاری كێله‌ به‌ردانێی ده‌كرد،به‌ره‌و مۆندیال سه‌ركه‌وت.

هه‌واداران و لایه‌نگرانی هه‌ڵبژارده‌كانی مۆندیال، هه‌رچی یه‌كه‌م رۆژ هه‌ڵبژارده‌كه‌ی یاری هه‌بوایه‌، له‌تۆڕه‌ كۆمه‌ڵایه‌تییه‌كان ده‌ینووسی (ئه‌مڕۆ مۆندیال ده‌ست پێده‌كات)، له‌لای من شه‌وی 25 له‌سه‌ر 26-6-2018 مۆندیال ده‌ستی پێكرد، چونكه‌ئه‌مشه‌وه‌ رۆشنای چاوه‌كانم به‌ كوردێكی پڵنگ و دلێر و كۆڵنه‌ده‌ر و چووست و چالاك و زرینگ و ژیر و روح سووك و مه‌رد كه‌وت،له‌م یارییه‌دا هه‌موو بیر و هه‌ست و سۆز و گیانی وه‌رزشی و بڕوا و توانام له‌پێناو بینینی شوانكاره‌یه‌ك بوو كه‌ بۆمن و نه‌ته‌وه‌كه‌م جێگای شانازی‌ و سه‌رسوڕمان بوو، توانی جه‌ربه‌زه‌ و زه‌به‌لاحی و خۆ به‌زلزانی ئه‌ستێره‌كی گه‌وره‌ی مۆندیال له‌گۆڵ تۆماركردن به‌لێدانی سزا بوه‌ستێنێ!، ئه‌م قاره‌مانه‌ عه‌لیڕه‌زا بیرانوند-ی‌ گۆڵچی‌ هه‌ڵبژارده‌ی‌ ئێران بوو، دڵنیام گه‌ر به‌خه‌ونیش بێت هه‌ڵبژارده‌ی تۆپی پێی كوردستان له‌مۆندیال یاری هه‌بوایه‌ ئه‌وتاكه‌ گۆڵچی هه‌ڵبژارده‌ی كوردستان بوو، چونكه‌ هه‌رزه‌كارێكی شوانكاره‌ له‌ دێیه‌كه‌ی خۆیان به‌رپه‌رچی خانه‌واده‌ و ژیان ده‌داته‌وه‌ له‌كێله‌ به‌ردانێ به‌ره‌و مۆندیال هه‌ڵده‌كشێ،بۆیه‌ لای من ئه‌مشه‌وه‌ مۆندیال ده‌ستی پێكرد.





PM:03:30:27/06/2018




ئه‌م بابه‌ته 159 جار خوێنراوه‌ته‌وه‌‌