پێشمه‌رگه سپۆرت -
پاش ئه‌وه‌ی له پالاَوتنی یاریزانانی هه‌ڵبژارده‌ی گۆڕه‌پان و مه‌یدانی عێراق بڕیار درا كه كه‌مپی مه‌شقی ئاماده‌كاری هه‌ڵبژارده‌ی لاوانی عێراق بۆ هه‌ردوو ئاسته‌كانی كوڕان و كچان له شاری سلێمانی بێت ، ئه‌و كه‌مپه بۆ شاری كه‌ربه‌لا گواسترایه‌وه .
فیدراسیۆنی گۆڕه‌پان و مه‌یدانی عێراق بڕیاری دا به ئه‌نجام دانی كه‌مپێكی هه‌فته‌ی بۆ یاریزانانی لاوانی هه‌ڵبژارده‌كه كه به‌شداری له پاڵه‌وانێتی ئاسیا ده‌كه‌ن ، له‌و باریه‌وه دكتۆر زه‌یدون ئه‌مینداری دارایی فیدراسیۆنی ناوبراو ڕایگه‌یاندبوو كه‌مپه‌كه‌یان له شاری سلێمانی ده‌بێت و بۆ ماوه‌ی هه‌فته‌یه‌ك به‌رده‌وام ده‌بێت .
هۆكاری گواستنه‌وه‌ی كه‌مپه‌كه بۆ شاری كه‌ربه‌لا
زه‌رده‌شت ڕه‌فیق ڕاهێنه‌ری گۆڕه‌پان و مه‌یدان له یانه‌ی پێشمه‌رگه سه‌باره‌ت به ئه‌نجام نه‌دانی كه‌مپه‌كه له شاری سلێمانی تایبه‌ت به پێشمه‌رگه سپۆرتی ڕاگه‌یاندوو ووتی ، له شاری به‌غداد دكتۆر زه‌یدوون ئه‌مینداری دارایی فیدراسیۆنی گۆڕه‌پان و مه‌یدانی عێراق پێی ڕاگه‌یاندم كه هاوكاریان بكه‌ین له دابین كردنی هۆتێل و وه‌ك یانه‌ی پێشمه‌رگه‌ش پاسیان بۆ گواستنه‌وه‌ی یاریزان بۆ دابین بكه‌ین كه یانه‌كه‌مان ئاماده‌ی هاوكارییه‌كانه .
زه‌رده‌شت ووتیشی پاش ئه‌وه‌ی دكتۆر زه‌یدوون وتووێژی له‌گه‌ڵ ڕاهێنه‌رانی هه‌ڵبژارده‌ی گۆڕه‌پان و مه‌یدانی عێراق كرد ڕاهێنه‌ران پێیان ڕاگه‌یاندبوو كه به‌هۆی نه‌بوونی كات فریا ناكه‌ون كه‌مپه‌كه له شاری سلێمانی ڕێك بخه‌ن هه‌ربۆیه بۆ شاری كه‌ربه‌لا گواسترایه‌وه .
ئه‌و ڕاهێنه‌ره‌ی پێشمه‌رگه ووتیشی ، كه‌مپه‌كه ماوه‌ی 5 ڕۆژ ده‌خایه‌نێت و له به‌رواری 2 / 6 / 2018 شاندی هه‌ڵبژارده‌ی عێراق گه‌شت ده‌كه‌ن بۆ به‌شداری له‌و پاڵه‌وانێتیه به‌هێزه‌دا .
فیدراسیۆنی گۆڕه‌پان و مه‌یدانی عێراق شاری سلێمانی بۆ ئه‌نجام دانی كه‌مپه‌كان به شیاو ده‌زانێت.
زه‌رده‌شت ڕه‌فیق ئاماژه‌ی به‌وه‌دا كه دكتۆر زه‌یدوون پێی ڕاگه‌یاندووه بۆ داهاتوویه‌كی نزیك و له‌سه‌ر ڕه‌زامه‌ندی لیژنه‌ی ئۆڵۆمپی عێراق ، كه‌مپی مه‌شقی ئاماده‌كاری هه‌ڵبژارده‌ی عێراق بۆ ئاسته‌كانی پێشكه‌وتوانی كوڕان و كچان دێنه شاری سلێمانی كه ئه‌و هه‌ڵبژارده‌یه ئاماده‌كاری بۆ پاڵه‌وانێتیه‌كانی ( خۆر ئاوایی ئاسیا و خولی یارییه وه‌رزشییه‌كانی ئاسیا ) ده‌كات كه بڕیاره له مانگه‌كانی 7 و 8 ئه‌م ساڵ ئه‌و دوو پاڵه‌وانێتیه به‌هێزه به‌ڕێوه بچێت .