ته‌ندروستی -
کاتێک کە تازە لە شوێنێک کاردەکەیت و تازە فەرمانبەریت، زۆر جار بەهۆی کەمی شارەزاییەوە توشی گرفت دێیت، هەندێک جار گرفتەکە زۆر بچوکە بەڵام دەبێتە هۆی بەهەڵە تێگەیشتن و لەوانەشە کارەکەت لەدەست بدەیت، بۆیە ئەوانەی تازەن ئەم ١٠ ئامۆژگارییە بۆ ئێوەیە:
١-زۆر بەباشی بەندەکانی گرێبەستەکەت بخوێنەوە، پرسیار دەربارەی هەر بەندێکیش بکە کە ڕوون نییە لات بەر لەوەی ئیمزا بکەیت.
٢- دەربارەی ئۆڤەر تایم بپرسە، واتە بزانە کاتژمێری زیادی کارکردنت بۆت هەژمار دەکرێت یان نا.
٣- سەبارەت بە جۆری کارەکەت بەوردی لە بەرێوەبەرەکەت بپرسە بۆ ئەوەی بەهۆی تێنەگەیشتنت لە ئەرکی سەرشانت وانەزانن کەمتەرخەمیت.
٤- لە زۆر کۆمپانیا و شوێنی کارکردن کەسێک هەیە کە ڕاهینەرە و زانیاری بۆ فەرمانبەرە تازەکان دەگوازێتەوە، دەبێت هەر لەسەرەتا لەو کەسە بپرسیت و ئەگەر زانیت کە تەواوی زانیاریەکانت بۆ ناگوازێتەوە داوای ڕونکردنەوەی زیاتری لێبکە یان داوای گۆڕینی بکە.
٥-بەهیچ جۆرێک لەسەرەتای دەستبەکاربوونت لەگەڵ فەرمانبەرەکانی تر دەمەقاڵی مەکە و واخۆت پیشان مەدە کە لەوان زیاتر دەزانیت.
٦-بەهیچ جۆرێک لەسەرەتا داوای مۆڵەت مەکە و تەرکیزی تەواوت بخەرە سەر کارەکەت، چونکە یەکەم یەکەم تێڕوانین زۆر گرنگە و بەئاسانی ناگۆڕدرێت.
٧-بەهیچ جۆرێک لەسەرەتا رەخنە لە شێوازی بەڕێوەبردن و ئیشی بەڕێوەبەرەکەت مەگرە، بەڵکو دوور لە موجامەلە هەوڵبدە نەرمی بنوێنیت.
٨- هەوڵبدە هەموو ڕۆژ دوو هەنگاو خۆت پێش بخەیت بەڵام هەنگاوێکیش بڕۆ دواوە، واتە زۆر بەخیرایی مەچووە پێشەوە بۆ ئەوەی بەهەڵە لێت تێنەگەن.
٩-ئەو هاوکارانەی لەسەرەتا دەیانەوێت فێری ئێش کردنت بکەن و لەگەڵت باشبن، کەسانی باشن هەوڵبدە هاورێیەتیان بکەیت و دوریش بکەوە لەوانەی کەموکورتیەکانت ئاشکرا دەکەن .
١٠-بەهیچ شێوەیەک لەسەرەتا لای فەرمانبەرەکانی تر باسی بەرێوەبەرەکەت یان فەرمانبەرەکانی تر مەکە.
دەبێت بەردەوام شتی نوێ لەسەر چۆنیەتی پێشبردنی خۆت بخوێنیتەوە و سەیری ڤیدیۆ بکەیت و لەوانی تر بپرسیت.بێگومان دەبێت دوای ساڵیک ڕەخنە و پێشنیار پێشکەش بە بەڕێوەبەرەکەت بکەیت بۆ ئەوەی بتوانیت بەردەوام بیت لەهەمان شوێن.